Абай шығармаларын ұрпақ санасына сіңіру – әр перзенттің парызы. Сондықтан да ұлы ақын мерейтойы қарсаңында тәлімді әдеби,мәдени-тәрбиелік шаралар Атырау инженерлік гуманитарлық институтында көптеп ұйымдастырылуда.
25 ақпан күні институт пен Атырау қалалық орталықтандырылған №1 кітапханасының №4 жылжымалы кітапханасы бірлесіп ұйымдастыруымен «Болашаққа бағдар:рухани жаңғыру» бағдарламасы аясында Ұлы ақын, философ, жазба әдебиетінің негізін салушы Абай Құнанбаевтың туғанына 175 жыл толуына орай «Сөз асылы – Абай әлемінде» атты әдеби-танымдық ойын ұйымдастырылды.
Шараға институттың студенттері, оқытушылар,бөлімдер қызметкерлері қатысты. Әдеби-танымдық шараның мақсаты – жоғары оқу орны қабырғасында білім алып жүрген жастардың Абай шығармаларына деген сүйіспеншілігін,олардың танымдық, бәсекелестік, логикалық ойлау қабілеттерін арттыру болды.
Әдеби-танымдық ойын сағатын кемеңгер ақынның «Адамның адамшылығы – ақыл ғылым, жақсы ата, жақсы ана, жақсы құрбы, жақсы ұстаздан болады деген» ғибратты ойынан бастаған жылжымалы кітапхана меңгерушісі Замира Бибиқызы Құмарова алғы сөзінде ақын шығармашылығының тәрбиелік мән-мағынасы терең, адамгершілік мақсат-мұраттарын білдіретін ой-толғаныстарын талдап айтты. Абай Құнанбаевтың орыс халқының ұлы ақындары А.С. Пушкиннің, М.Ю. Лермонтовтын аударма өлеңдерінің эстетикалық мәніне талдау жасады.
Абайдың өмірбаяны мен шығармашылығына қатысты сұрақтар қойылды. Абайдың аудармалары мен поэмаларынан үзінділер келтірілді. Студенттер Абайдың өлеңдерін жатқа оқып, ел арасына жақсы таныс әндерін де шырқап берді.
Танымдық-интелектуальдық шараны ұйымдастырушылар ұлы ақын,философ Абайдың өсиеттеріне жас ұрпақ құлақ асса, ел болашағы жарқын болмақ,- дейді.
Абай өлеңдерін оқумен басталған шара, оның «Қара сөздері» бойынша пікірталастармен ,жақсы ,еркін ой түюмен жалғасты. Студенттер ұйымдастырушы кітапхана қызметкерлеріне сұрақтарын да қойып, тұщымды жауап алды.
Бұл ойында сұрақтарға көп жауап беріп, белсене араласып жақсы танымдық ойын көрсеткен «Информатика» мамандығының 1 курс студенті Аманбаева Ақтілек есімді студент жеңіске жетіп Алғыс хатпен марапатталды.
АИГИ Баспасөз қызметі.